Sciarra tra unu ri Pachinu e unu ri Terranobbili. Versi ru 1923 di Corrado Orlando, coti di Paulo Valvo re anziani di Pachinu. I    PACHINU L'imperaturi di Custantinopuli, si nni jiu a la verra cu fushila e sciabbuli, e Vittoriu terzu, di gran zanghu nobbili, fu vitturiusu, vincituri e abbili. Vinciu Tripuli cu cittati nobbili, vinciu li terri cu ghiardina e arbuli. Viva Pachinu e abbassu Terranobbili, picchì ci campa l'omu misarabbili. II    TERRANOBBILI Pachinisazzi rannizzi e variabbili, e tarnabbulisi nun l' at' a muntuvari! I Tarnabbulisi vi cuntunu parabbuli, ch’ e pachinisi vi puonnu accattari! Su' tutti ricchi di jardini e arbuli, varchi di pisca e bastimenti a mari; i pachinisazzi siti tutti misarabbili, ca mancu aviti culu pi cacari. III    PACHINU Apprositi veri a li ficupalari, ca siti tutti nobbili e riccuna; e veramenti siti prupritari: di funci, sparici, mareddhi e carduna. E ssi vi spìenu unn’ e' lu vostru stari: ntom paisièddhu ca nun ci su lampiuna. Passata di frascaluori e ricuttari, comu parrati chi vostri patruna? IV    TERRANOBBILI e quannu mai ati vistu patruna, né massari e mancu ribbittieri? Paisi persu, chinu ri mprugghiuna, cunzumacasi ri tutti li maneri! V’ avantati ca siti patruna… ma soccu ci mprugghiati e furastieri? ca nun vi vuonnu mancu pi garzuna, né p’ annittari staddhi e arrunzari fumièri. V    PACHINU I tarnabbulisi si canusciunu re pieri, se sunnu puorci o sunnu cristiani. E ssi canusciri vuliti a li mugghieri, su chiddhi chi struppuna nta li manu, ca scippunu curina, trazzeri trazzeri: a Cuffara, a Pagghiarieddhu e a li Vardiani. E poi, Tasca vi manna li campièri, e v’ assicuta comu tanti cani. VI    TERRANOBBILI I tarnabbulisi sunnu li cristiani, ca 'n facci a vuautri su milordi ngrisi; vannu vistuti comu li suvrani, e sunnu la nmiria r’ ogni paisi. Lu vestiri re francisi e miricani, è mudellu sciutu re tarnabbulisi. Nun zunnu comu a vuautri rapatani, rozzi, piddhirini pachinisi. VII    PACHINU e quannu mai ati vistu cammisi? Mancu sapiti chi culuri hannu! Li robbi l' ati vistu a cu' l' havi misi, picchì li mastri pi vuautri nun ni fannu. Pieddhi ri crapi e di crasti martisi, v’ ancuppulati comu vannu vannu, e fititi peggiu di li magunzisi, comu la genti ca tinia Ganu. VIII    TERRANOBBILI I pachinisi su' figghi ri Ganu, e ssu' divoti di Ièmpiu Galiuni. A Sirausa, quantu ci nni vannu, pi testimoni farsi, a la priggiuni. cu quali cori, spinciti la manu n facci a Cristu, cu lu vulanzuni? Lu pachinisi, pi li vintun-granu, si vinniu a Cristu e s’ abbrazzau maccuni. IX    PACHINU E tempi ca rignava re Niruni, a Terranobbili guvirnava Giura, Marsiliu, Pulicanti e Falsitura. Erunu tarnabbulisi ri natura: Barabba, Gaifessu e Gairuni, li nimici ri Cristu, traritura. I tarnabbulisi, pi essiri cafuna, cci rèsunu a Cristu l' urtimi dulura. X    TERRANOBBILI I pachinisi siti tutti mpustura, e a tutti la linghua v’ avissuru a tagghiari, ca n' amprugghiati ri tutti li culura, e apposta la scuminica vi cari. E tempi ca rignava Giura, Terranobbili nun asistia, senz' ammintari! Ca 'n facci a vuautri semu prufissura, e quannu ni viriti v’ at' a scappiddhari. XI    PACHINU Oh!.. chi murellu di gran facci rari, fashiti nnammurari a li Jurèi. Fimmini e ommini pariti sumari, besti sbarcati ri li Cunzirièi: unni ci su' lupi, sciacalli e scuzzari. Chissa e' la stirpi vostra, o vi su zièi! Ora, u Guviernu pi fari rinari, rishi ca v’ hav' a purtari a li musei. XII    TERRANOBBILI E pachinisi v' hann’ a purtari a li musei: fimmini e ommini, schetti e maritati, besti ri li muntagni e li furièi. Paisi ri scimmiuna ammalariati, facciazzi ri shinisi sarafèi; figghi ro ranghutanghu ginirati. E ssi sfidati li putenzi eurupei, pi maravigghia lu premiu pigghiati! XIII    PACHINU cu quali facci, sarvaggi, parrati? Arbazzi di la furesta tripulina. Lu Guviernu vi teni assidiati, e vi pasci comu l' ursi a la marina. L'ommini o ranghutanghu assimigghiati, li fimmini rigurusi maialieddhi. E ssi pi ssorti a Pachinu acchianati, pariti comu tanti puorcispini! XIV    TERRANOBBILI I pachinisi siti tutti malispini, siti chiacchiarunazzi e papparusi, ca sciarri ni shircati senza fini. Fimmini e ommini, sguaiati e bausi, i tarnabbulisi vi rumpunu li rini, e v' a fannu finiri d' essiri mafiusi! a cu' rishiti, sarvaggi e puorcispini? Passata di crasti e canazzi rugnusi! XV    PACHINU Chiuttuostu, ca ni pariti rispittusi, beddha ca vi la cantu tunna e chiara; s' i pachinisi nun fussuru ginirusi, passassuvu tutti sutta la mannara! Si nun vi nni jiti e nni shircati scusi, na brutta fini pi biautri si pripara. I tarnabbulisi siti tutti rigurusi, sulu a scurciari ossa a la Tunnara. XVI    TERRANOBBILI Si niautri scurciamu ossa a la Tunnara, nun zemu comu a vuautri fumirari. 0 novantunu, chi gran cosa rara… quantu fummieri putistu carriari. Cci lu purtastu finu a la Favara, a un zordu o carrettu, a li Spaccafurnari, e passastu 'na vita tant' amara, pi essiri manciuna e mpanatari. XVII    PACHINU I tarnabbulisi siti tutti prupritari, ca ci aviti fattu u prièstitu a li Taschi; A San Gaitanu fashistu cripari, privu di bummi, di festi e di maschi. Nn' ati furriatu vaneddi e furnari, muorti ri friddu, spiddhizziati e laschi; e pi la fami, pi sordi e sanari, pirdistu u sceccu cu tutti li fraschi! XVIII    TERRANOBBILI Ammatula pachinisi ca t' ammaschi, chi tarnabbulisi pani nun ti nni 'uschi! A ttia la fami ti sfunna li naschi, nmiènzu li mprogghi ti pierdi e t' anfuschi. Rugnusu, cu la rugna nta li naschi; ti scanti , si li carni ti l’ abbuschi. Si vvota ventu e vènunu burraschi, pachinisazzi at' a 'mmuccari muschi! XIX    PACHINU I Tarnabbulisi at' a ‘mmuccari muschi! S' iddhu vota sciroccu a lu Livanti, morti di friddu, spiddhizziati e laschi, vi nni jiti a fari li limusinanti. Si vi sfashiti e pigghiati li fruschi, cu la miseria spariti tanti e tanti. Si vvota vientu cu lampi e surruschi, addiu Terranobbili e abbitanti. XX    TERRANOBBILI Chianci Pachinu pi biautri gnuranti, ca siti tutti stupiti e viulenti. Vi sintiti riccuna e mircanti, prupritari di vigni e parmienti. Ma s' iddhu veni n' annata vacanti, arrivati ar essiri l' urtimi pizzenti. M’ armenu zittitiví! Zingari e furfanti, mprugghiuna, pachinisazzi ntacca genti. XXI    PACHINU Terranobbili e' nmarcatu all'Orienti, e i tarnabbulisi siti tutti crapari. Chi stavunu allegri e com’ erunu cuntenti, quannu Brunu ci rapiu li tunnari. Brunu, viriènnu ddhi beddhi jumenti, strata a peri nun ni vosi fari… Ntravacca e fa la straggi re nnuccienti, e crisci la razza di li spaccafurnari. XXII    TERRANOBBILI Jiti shircannu a cu' e' ch' hav' a 'mmazzari a vuautri, ucchi d'infernu pachinisi. Paisi di veri crasti e picurari; comu parrati chi tarnabbulisi? A li vuostri jumenti puonu ntravaccari, usanza ri vuautri crasti pachinisi. Stativi zitti, chi parratí a fari, muli bastardi di li mistrittisi. XXIII    PACHINU Pi buoi vi teni Tasca e pi crasti lu Marchisi, ch' aviti corna ca fannu paura. Cu vuautri nun zi po pigghiari mprisa; cu' metti scummissa, la perdi di sicuru. pi corna sunn’ avanti li francisi; ma vuautri li vinciti addirittura! Viva li corna re tarnabbulisi, ca hannu pisu, qualita' e misura. XXIV    TERRANOBBILI I pachinisi aviti la mintura, lu stessu re curnuti appatintati. Aviti curnazza di mala misura, e cu' l' havi chiu' luonghi lu dazziu paiati! Ora u Guvernu v’ha scrittu a la shinzura; percio ci ait' a paiari puru li spisati. I pachinisi, aviti sta sbintura di essiri curnuti e vastuniati! XXV    PACHINU Putíti cripari e moriri ammazzati! e cu cripari o nfièrnu vi nni jiti. Sarvaggi, turchi senza battizzati, ca 'n mienzu a li Cristiani vi mittiti. Ma, vuautri stessi, chi nun vi n' addunati? Chi fietu di sarvaggiu ca fashiti? Pugnu di carcasconci, scarcagnati, e patruna vuostri nun li canusciti? XXVI    TERRANOBBILI Vi canuscemu cu' siti e cu' nun ziti, paisi persu, cormu di gnuranza. Stupiti e gnuranti, ca autru nun ziti, vistuti di 'na stupita arruganza. Rishitini: di niautri chi rishivisti?… Ca risprizzati la vera fratillanza. Ch' e' beddhu stu parrari ca fashiti. Pariti puorci! Parrannu cu crianza. XXVII  UNU RI MARZAMEMI CHI TALIAVA A SCIARRA Si parti Marzamemi, a manza a manza, cu tantu ri ngegnu e nobbili parrari: “Fermi tutti rui! Cà nun c'e' sustanza! pi quali mutivu v’ avit’ a sciarriári? Uffisa nun ci nni fu e mancu mancanza; rativi a manu, e v' at' a rispittari!” Si la strincieru cu vera fratillanza, e ssi curmarunu di vasi e cosi rari. XXVIII    POPOLANO E chi viristu! la musica sunari! 'm piazza, 'n ogni locu e 'n ogni via. Tutta Pachinu si misi a ballari: la bassa plebbi cu la signuria. Di Terranobbili, nun n' hagghiu chi cuntari… Ogni omu chi festa ca fashia. A vvushi fuorti si misiru a gridari: "Viva la pashi e vviva l' alliria!” XXIX    L'AUTORE Currau Orlando munta 'n fantasia, ca sti rui paisi ha fattu ripigghiari. Ci pigghiava spassu e cci riria, e chiussai lu fuocu lu fashia sbampari, mentri sta granni storia si fashia. Ca', la menti mia potti arrivari… e ssi cc’ e' erruri nilla puisia, prega l' amishi ca l' hannu a scusari. XXX    L’AUTORE Currau Orlando cessa d' impruvvisari, e cessa puru la so rozza Musa. Si quarche Pueta, miegghiu a sapi fari, Currau Orlando ci addumanna scusa. Anchi lu nomu miu fazzu firmari: sugnu Sicilianu di la terra prizziusa. Si vvuliti sapiri unn' èni lu me stari, esti a Pachinu, pruvincia di Sirausa.