Mastru Serafinu
Pueta

LU POPULU MALATU

Fermati menti mia, un parlari, penza.
Scusati si vinni a casu stranu,
Signuri vi fazzu a tutti a rivirenza.

Iò vegnu di li celi chiù cilestri
D'un tempiu fabbricatu senza mastri,
Nun c'è porti, purtuna, né finetri,
Né pili, né pilacciuna, né pilastri,
Né dotti, né screnziati, né maestri,
Né gaddhi, né gaddhini, né puddhastri,
Sulu c'era iò cu st'abbiteddhu,
Rishitimi sugnu beddhu o un zugnu beddhu?

Ora chi ccà sugnu arrivatu,
Nta stu paisi nobbili e pulitu,
Lu populu attruvai tuttu malatu,
Hannu lu stomacu frarishu e purritu.
C'è cu campa bonu er è ntrunatu,
C'è cu è sempri afflittu, striminzitu.
Viniti malati chi nun stati beni,
Visitamu stu mali r'unni veni.

Amicu nun hai panza malata,
Tu vai a travagghiari la campagna,
Hai zappatu e dopu na jurnata,
ci voli un chil'e mazzu di lasagna,
E pi daricci 'assenzu e ben nzucata,
ci voli un piattu cuantu na muntagna;
Tu stu piattu nun l'hai, resti afflittu,
Ti resta la malatia di lu pitittu.

Chistu havi la stessa malatia
Si viri cun ci havi nenti nta la panza.
Quantu havi cun manci tu? dimmillu a mia.
Mancu vai parlannu cu crianza!
Nta tanti famigghi c'è n'epidemia,
Famigghi d'operai n maggiuranza;
Picchì si visitati l'impiati
Stannu beni, campanu biati!

Pi chistu, ci voli carni e maccarruni,
La nirvatura l'havi tutta sana,
Fishi lu cantieri a lu comuni,
Nton annu ci travagghiau na simana.
E quannu di la summa fu patruni,
Pi sustanza s'accattau na milinciana,
Chi la sustanza pi l'operai e gintuzzi,
L'hannu li milinciani e li cucuzzi!

E suppurtannu chista malatia,
Si sapi di runni veni lu difettu,
È l'epuca di cu mancia e cu talia
E di cu s'arrancia a sunari l'organettu.
Nun basta bravura e mancu giumitria,
Tecnica, cultura né ntillettu,
È comu lu jocu di la zicchinetta,
Lu bancu ni spogghia a tutti la sacchetta!

Fineru li festi di Cannalivari,
Si ritira lu mastru cu la puisia,
Nun zugnu dottu di filosofia.
Amishi e nimishi chi sati ar ascutari,
Sin'anchi a chiddhi chiù dotti ri mia,
Si c'è quarchunu ch'un arristau cuntenti,
L'annu chi beni ritornu novamenti.

La viggilia di lu votu chi gran festa!
Chi granni rivugghiu chi succeri!
Nta tutti li paisi c'è timpesta,
Chiacchiari, spillacchiari peri peri,
Ni vennu a ghinchiri la testa
Tutta, d'illusioni e di pinzeri,
Pi lu nostru eccellenti votu dari
A lu spillacchiu chi tenta d'acchianari.

Si prisenta lu zu Cicciu n cumpagnia
Rishennu:C'è n'amicu candidatu,
Tu parla cu to patri, cu to zia,
Ti raccumannu tuttu stu vishinatu;
Tu jetta un zautu a la perifaria,
Prumetticci a quarcunu ch'è spustatu,
E a li maistreddhi riccillu beddhu tostu:
Acchianannu l'amicu c'è lu postu!

L'amicu a lu zu Cicciu ci acchianau,
Di n mezzu di lu fanghu si nni sciu,
dhà la manciatura s'abbrazzau,
Sa passa bona ringraziannu a Diu.
Lu zu Cicciu jiu m Palermu e lu truvau
Pi favuriri a un terzu chi sbattiu
L'amicu sciu cun beddhu spuntu
A lu zu Cicciu nun ci retti cuntu.

Trent’anni fa, nta stu paisi,
Lu zu Shicciu e Bastianeddhu
Vinnianu l’acqua strati strati,
A na lira o sicchiteddhu.
Tutti chi currianu,
Cu li bummuli, assitati,
E spissu succirianu
Li sciarri e cutiddhati.

Lu prugressu ha ghiutu avanti,
(sia ludatu e binirittu!),
Nun c’è casa, nun c’è strata,
Chi nun havi l’ashiddhittu.
Vabbeni chi nun currinu
Di la sira a la matina.
Ma ni lavamu, ni sciacquamu,
C’impastamu la cuashina.

La za peppa mpacchianeddha,
Lu zi Cicciu n caus’ i tila,
Di notti si susianu,
Pil u micciu da cannila,
Li surci ci lu manciavanu
E o scuru lu shircavanu.
Peppa dunn’è? Nto cantaranu.
Tra tannura e piattaloru,
Cun cirinu nt ana manu
E l’autra manu a l’ogghialoru.
Ora lu surci nun ci va chiù
C’è a piretta e l’abbashiù.

Picciriddhi, nta la scola,
Pi fari la pipì,
Di ritrè mancu ci nn’era,
La fashianu accussì.
La scola era ridicula,
Cu cadenti mura e porti.
Ora nmeshi i scoli brillanu,
Cci su tutti li cunforti.

Ricordu la Dumunica,
cu li scarpi lushidati,
Nto nmernu scapisavamu
Lu fanghu strati strati.
Ora i fanghi dunni su?
puru li curtigghia su asfartati!
Dunni c’eranu casupuli,
C’è li granni palazzati.

Pashecu sì un zalottu,
Da Siniazza a Biviratura,
Pi turisti e prisidenti;
Deputati e sinatura.
Jò dessi manu e peri,
Sugnu figghiu tou divotu,
Pi discrivirti chiù beddhu,
Sugnu lu veru pashicotu.

Passava un omu pi la strata,
Cu la so testa china di pinzeri,
Lu suli era curcatu, a la scurata,
Caminava supra u marciaperi,
Quannu nta lu pettu di lu giacchittuni,
Si sintiu arrivari un gran sculuni.

Si ferma a stu sculuni, lu talia,
Lu guarda attentament, ci fa casu,
A primu acchitu scarcu ci paria
O cuarcunu chi si shiusciau lu nasu.
L’occhi versu supra si suspisi,
Vitti na cuppietta e si riprisi.

Guarda lu balcuni e la firrata,
C’era na gran fimmina baffuta,
Un picciuttunazzu a tinia abbrazzata.
S'avianu fattu na guduta.
Dh’omu rifletti e si riprimi,
Unn’è scarcu, unn’è morvu, unn ‘è saimi.

Tuppulia sutta, nto purtuni,
Affaccia na signura e so maritu.
Addumanna: Cu c’è na stu balcuni?
C'è me figghia e lu so zitu.
Maritu e mogghi attentanu alluccuti:
Ccà m pettu haiu a vostru niputi!

Lu turista chi gira pi lu munnu
Nni cunta nta li nazioni soccu fannu:
N Germania pi la meccanica nun c’è funnu,
N Svizzera pi l’ossigginu chi hannu,
N Somalia pi li banani chi cci sunnu,
In Russia c’è la nivi tuttu l’annu.
In Italia ch’è un locu di sapienti,
Unu travagghia e deshi fannu nenti.